Eins og titillinn gefur til kynna fjallar sagan um tvo bræður á bænum Hlíð, þá Óla og Árna. Óli er þó í fyrirrúmi. Þetta er saga um lítið samfélag í sveit, lífsbaráttu fólks, ástir og örlög.

Eyjólfur Guðmundsson var Mýrdælingur og gjarnan kenndur við bæinn Hvol þar sem hann bjó. Hann var atkvæðamikill í sinni sveit, lengi hreppsstjóri og sýslunefndarmaður, en auk þess að sinna félags- og framfaramálum í heimabyggð, stundaði hann búskap, sinnti kennslu um skeið og fékkst við ritstörf. Fyrsta bók Eyjólfs, Afi og amma, kom út árið 1941 og fáeinum árum síðar Pabbi og mamma, báðar endurminningabækur sem nutu mikilla vinsælda.

Kristján Róbert Kristjánsson les.

The Man Who Knew er spennusaga með rómantísku ívafi eftir enska rithöfundinn Edgar Wallace (1875-1932). Hér segir frá hinum sérvitra og ofurnákvæma Saul Arthur Mann sem aðstoðar lögregluna við lausn sakamála. Þegar hann rannsakar dauða milljónamærings í London kemur ýmislegt óvænt upp á yfirborðið. Sagan kom fyrst út árið 1918 og kvikmynd var gerð eftir henni árið 1961.

Howard Skyman les á ensku.

Hér eru fjögur ævintýri eftir H. C. Andersen: Prinsessan á bauninni, Tindátinn staðfasti, Eldfærin og Ljóti andarunginn. Sögurnar taka rúmlega klukkutíma í flutningi.

Lesarar eru Ingibjörg Sól Ingólfsdóttir, Þóra Hjartardóttir, Dóra Wild og Ingólfur B. Kristjánsson.

Birgir Ísleifur Gunnarsson sá um tónlist og hljóðvinnslu.

Þetta er rómantísk smásaga sem fjallar um ungan breskan aðalsmann í Feneyjum. Hann stundar þar málaralist og fær dag einn boð um að mála eina af auðugustu og tignustu konum Ítalíu.

Höfundurinn Charles Andrew Garvice (1850-1920) sérhæfði sig í rómantískum skáldsögum og gaf út meira en 150 bækur með slíku efni. Þær nutu óhemju vinsælda um allan heim og var talað um að enginn breskur rithöfundur hefði þá notið jafn mikillar velgengni.

Kristján Róbert Kristjánsson les.

Hér er á ferðinni fjórða og síðasta bindið í ritröðinni Menn og menntir siðskiptaaldarinnar á Íslandi. Er óhætt að segja að það sé lykilrit um þennan tíma og er umföllunin mjög ítarleg og góð.

Aðal sjónarhornið hér eru höfðingjarnir Arngrímur Jónsson lærði og Guðbrandur biskup Þorláksson. Í grunninn er þetta rit um Jón Arason doktorsritgerð Páls. Þetta fjórða bindi kom út árið 1926. Hefur það rit verið ófáanlegt um nokkurn tíma og ætti því að vera fengur öllum þeim sem áhuga hafa á íslenskri sögu.

Páll Eggert fæddist á Stóru-Vogum á Vatnsleysuströnd 3. júní 1883. Foreldrar hans voru Óli Kristján Þorvarðsson, steinsmiður í Reykjavík, og Guðrún Jakobína Eyjólfsdóttir. Páll lauk stúdentsprófi frá Lærða skólanum 1905, cand.phil.-prófi 1906, embættisprófi í lögfræði við HÍ 1918 og hann hlaut doktorsnafnbót við HÍ 1919 fyrir rit sitt um Jón biskup Arason.

Ritverk Páls eru feikimikil að vöxtum og munar þar um ritaskrá Landsbókasafnsins og skrá yfir rit háskólakennara. Þá tók hann saman lögfræðingatal en er líklega þekktastur fyrir samantekt á Íslenzkum æviskrám. Auk þess má nefna Menn og menntir siðskiptaaldarinnar á Íslandi I-IV, Upptök sálma og sálmalaga í lútherskum sið á Íslandi, Jón Sigurðsson I-V, og Sögu Íslendinga IV, V, og fyrri hluta VI. bindis.

Jón B. Guðlaugsson les.

Daníra er rómantísk skáldsaga sem gerist á þeim tíma þegar Austurríkismenn réðu lögum og lofum í Dalmatíu sem nú er hluti Króatíu. Austurríska keisaradæmið réð þar ríkjum frá 1815 til 1918.

Herforinginn Gerald kemur þangað með flokki sínum til að berjast við heimamenn, en jafnframt til að hitta heitmey sína, Edith, dóttur yfirforingjans á svæðinu. Þá hittir hann Daníru og örlögin taka í taumana.

Elisabeth Bürstenbinder fæddist í Berlín árið 1838. Hún skrifaði fjölda skáldsagna undir karlmannsnafni, dulnefninu Ernst Werner. Sú fyrsta birtist á prenti 1873, en hin síðasta 1909. Elisabeth Bürstenbinder lést árið 1918.

Kristján Róbert Kristjánsson les.

Hér eru sex barnasögur af gamla skólanum. Sögurnar heita: Geiturnar þrjár (höfundur ókunnur). Fimm fingur, fimm synir (saga eftir James Krüss). Bjartur kóngsson og Blíður kóngsson (höfundur ókunnur). Flöskupúkinn (höfundur ókunnur). Björninn sem aldrei varð reiður (byggð á sögu eftir Charlotte B. Herr). Forvitna kóngsdóttirin (höfundur ókunnur). Sögurnar taka um 55 mínútur í lestri.

Sigurður Arent Jónsson les.

Smásagnasafnið Typhoon and Other Stories eftir Joseph Conrad kom út árið 1903 en þrjár af smásögunum fjórum höfðu þá áður birst á prenti. Sögurnar í safninu heita Typhoon, Falk, Amy Foster og Tomorrow.

Peter Dann les á ensku.

Í endurminningabókinni Pabbi og mamma segir Eyjólfur frá lífshlaupi foreldra sinna sem lengst af bjuggu í Mýrdalnum. Sagt er frá búskaparháttum, sjósókn frá sandinum og mörgu skemmtilegu fólki og atvikum. Margt var oft um manninn á heimili þeirra hjóna, en þau bæði atkvæðamikil og úrræðagóð.

Eyjólfur Guðmundsson var Mýrdælingur og gjarnan kenndur við bæinn Hvol þar sem hann bjó. Hann var atkvæðamikill í sinni sveit, lengi hreppsstjóri og sýslunefndarmaður, en auk þess að sinna félags- og framfaramálum í heimabyggð stundaði hann búskap, sinnti kennslu um skeið og fékkst við ritstörf. Fyrsta bók Eyjólfs, Afi og amma, kom út 1941 og fáeinum árum síðar Pabbi og mamma, endurminningabækur sem nutu mikilla vinsælda.

Kristján Róbert Kristjánsson les.

Brennimarkið er spennandi örlagasaga sem segir frá baráttu stúlkunnar Joan Carwer er hún reynir að brjótast undan oki þeirra karla sem vilja ráða hennar lífi og finna sér sinn eigin stað í tilverunni. Sagan kom fyrst út á ensku árið 1919 undir titlinum The Branding Iron og naut töluverðra vinsælda. Ári síðar var gerð kvikmynd eftir sögunni, en þá voru talmyndir ekki enn komnar á markað. Það er gaman að geta þess að kvikmyndin var bönnuð fyrir of mikla nekt og það að taka léttvægt á framhjáhaldi kvenna.

Katharine Newlin Burt var bandarískur rithöfundur sem einkum skrifaði vestra. Hún skrifaði einnig kvikmyndahandrit, sem var ný grein í þá daga, og að minnsta kosti sjö af sögum hennar voru kvikmyndaðar. Katharine fæddist árið 1882 og byrjaði mjög snemma að skrifa smásögur. Sögur hennar þóttu vel skrifaðar og á margan hátt róttækar ádeilusögur með skýra áherslu á réttindi og örlög kvenna. Eftir hana liggja um 30 skáldsögur. Fyrsta skáldsaga hennar kom út árið 1912, en The Branding Iron var önnur í röðinni.

Svavar Jónatansson les.